“La Virgen Roja” filmi, rejissor Paula Ortiz tərəfindən 2024-cü ildə yayımlanmışdır. Film ilk səhnəsi ilə məni dərhal özünə çəkdi. Açılışda istifadə olunan sözlər və təsvirlər filmin dərin məna qatları ilə tanış edir.
Filmin başlanğıcında feminist ideyaların vurğulandığı nəzərə çarpır. Lakin hadisələr inkişaf etdikcə, bu fikirlərə tənqidi yanaşma ön plana çıxır. Filmdə feminizm anlayışına qarşı maraqlı bir dialoq qurulur və tamaşaçıya düşünmək üçün zəmin yaradılır.
Ana və Qızı Arasındakı Münasibət
Ana obrazı (Najwa Nimri) filmin mərkəzindədir. O, öz qızını həyata keçməmiş arzularının daşıyıcısı kimi görür. Qızını mükəmməl bir qadın obrazına çevirmək cəhdi ilə onun fərdiliyinə zərər verir. Bu vəziyyət, qadınların cəmiyyətdə üzləşdiyi təzyiqlərə və “ideal qadın“ qəliblərinə kəskin bir tənqid kimi təqdim edir. Qızı (Alba Planas) isə bu təzyiqlər altında həm öz kimliyini tapmağa çalışır, həm də anasına olan bağlılığından qurtulmağa çabalayır. Bu mürəkkəb münasibət tamaşaçıda həm empatiya, həm də suallar yaradır.
Filmin Atmosferi
Filmdə hadisələrinin baş verdiyi ev mistik bir məkan təəssüratı yaradır. Bu ev, həm məbəd, həm də qəhrəmanların duyğusal vəziyyətlərini əks etdirən bir simvol kimi çıxış edir. Ana və qızın daim qara geyimdə olması, həm dini, həm də psixoloji alt məqamları gücləndirir. Filmin rəng istifadəsi və detallar təsir edici atmosfer yaradır.
Filmdə qadınların yaradıcı güc kimi göstərilməsi dəfələrlə vurğulanır. Lakin bu mesajların təkrarlanması bəzən tamaşaçını yorur. Buna baxmayaraq, hər bir səhnədə dərin mənalar gizlənir, bu da filmi dərindən təhlil etmək istəyənlər üçün maraqlıdır.
Rejissor İşi və Texniki Tərəflər
Paula Ortiz-in rejissor olaraq bu filmdə yaratdığı dünya, klassik İspan kinosundan çox, beynəlxalq üsluba yaxınlaşır. Film Hollywood estetikası ilə çəkilmiş olsa da, öz unikallığını qoruyur. Ssenaridə olan bəzi səhnələrin həddindən artıq uzunluğu bəzən filmin ritmini zəiflədir. Bu məqamlar, mənim üçün anlaşılmaz və yorucu oldu…
